文創副刊部落格

紅天赤日的彼一日

大家相招作伙來到市仔尾街

來看永過一位走方醫

伊怎樣行入民間，用真心看顧鄉親的健康

來看永過一位文學家

伊怎樣提筆創作，用手表達愛鄉土的熱誠

啊！往事隨風微微吹來

親像走街仔先閣轉來咱身邊

對咱講，我伴大家作伙去散步

行佇現代化彎來斡去的街路

想欲跟隨伊彼時走街的跤步

想欲體會伊彼時打拼的心情

鬧熱的街市看無悲切的面容，只有

一陣陣民主的芳味點焯歷史的記憶

目珠感覺濛霧一片

明仔載甘會記得昨暝的傷悲﹖

毋知是天頂的日頭太大，抑是

民主自由的溫度太高

大家的臉變甲紅吱吱

啊！往事隨風微微吹來

親像走街仔先閣轉來咱身邊

對咱講，我伴大家作伙去散步

向前行

一個毋識世事的大漢囝仔

站佇八卦山頂烏面大佛前

伊毋知｢勇士當為義鬥爭｣的意義

伊嘛袂曉走方醫八十年前的苦悶

猶原真大聲唸出＜低氣壓的山頂＞

彼時陣

有淡薄仔菊花芳佇空氣中飄揚

親像看到和仔先行佇咱頭前

聽到伊輕輕講

時代的進步和人們的幸福

原來是兩件事．．．．．．

啊！八卦山頂的輕風微微

走街仔先已經兜轉來咱身邊

對咱講，我伴大家作伙來前進！

註

１﹑走方醫﹑走街仔先﹑和仔先皆是賴和的別稱

２﹑彎來斡去﹕彎彎曲曲

３﹑跤步﹕腳步

４﹑點焯﹕點亮

５﹑＜低氣壓的山頂＞是賴和的詩作

６﹑永過﹕以前